శివరాత్రి

శివరాత్రి సందర్భముగా కవితా కోకిల పద్య పుష్పాలు

రచయత శ్రీదేవి రామకృష్ణ

బుగ్గరామయ, లింగదేవర, శంకరీశ్వర, శ్రీ శివా

మగ్గిపోయితి, మమ్ముబ్రోవర, మమ్ముకావర, శ్రీ శివా

నెగ్గలేకయు, మూర్ఖమానస, బంధుప్రీతియు, శ్రీ శివా

ఒగ్గిఉన్నను, సర్వరక్షక, పంచభూతక, శ్రీ శివా

మంగళాకర, నింగి ధీశుడు, హాహ కారుడు, శ్రీ శివా

లింగ దేవర, శాప మోక్షక, అంగ నిబ్బర, శ్రీ శివా

యోగి రక్షక, నాట్య రౌద్రుక, మర్మ హృద్యయ, శ్రీ శివా

ఛెంగు ఛెంగున, చెంచు లయ్యవు, దేహమే దయ, శ్రీ శివా

తెల్ల పాలను, భస్మ రాశిని, ఆకు వక్కల, పూజితా

వల్ల మాలిన, భక్తి భావము, నుండె వారితొ, పూజితా

శూల ధారిక, దీక్ష ధారణ, ధర్మ రక్షక, పూజిత

మల్లయ్యనిన, పంచకేశవ, పార్వతీపర, శ్రీ శివా

బిల్వ పత్రము, పువ్వ జిల్లెడు, గోవు పాలతొ, పూజితా

ముల్లొకాల్లలొ, గౌరి నామము, సైవ తత్వపు, పూజిత

భోళ శంకర, తుమ్మి పూలతొ, పువ్వు మారెడు, పూజితా

పాల లోచన, నిత్య పూజలె, నీల కంధర, శ్రీ శివా

భద్ర సృష్టిక, దక్ష రక్షక, దీక్ష రక్షణ, శ్రీ శివా

అంధ కాసుర, దుష్ట శిక్షణ, ధర్మ రక్షణ, శ్రీ శివా

రుద్ర నామక, భోలె నాధక, దివ్య భవ్యక, శ్రీ శివా

చంద్ర శేఖర, పాహిమాం శివ, పాప నాశిక, శ్రీ శివా

కోటి వెల్గుల దీప కాంతిని మాకు పంచిన శ్రీశివా

మట్టి లింగము పూజ చేసిన మోక్ష మిచ్చిన శ్రీశివా

తిట్టి మొక్కిన పార్వతి హర శంబు దేవర శ్రీశివా

వట్టి పూజలు చేసినా మము రక్ష చేసిన శ్రీశివా

--(())--


తిక్క శంకరయ్య
---------------------
వారంతా అమృతం కోసం పాలసముద్రాన్ని మధిస్తున్నారు.
దేవతలను అమరులుగా చేసేందుకు ‘అమృతం’ కావాలి.
‘అమృతం’ కోసం ప్రయత్నిస్తే వద్దన్నా వచ్చేది ‘హాలాహలం’.
‘హాలాహలం’  కాలకూట విషం. అది నిలువునా ప్రాణులని  చంపేస్తుంది.
ఆ తర్వాత  అమృతం వస్తే ఎంత? రాకపోతే ఎంత?
హాలాహలం వరకు  ఎవరైనా హరించేస్తే ఎంత బాగుంటుంది?
అప్పుడు ఒక ‘బైరాగి’ ముందుకొచ్చాడు.

అతడు బేసి  కన్నుల వాడు. గోచిపాత వాడు.
అతను మంచుని, మంటని ఒక్కటిగా లెక్క చేసే తిక్క శంకరయ్య.

చర్మమే ఆయన దుస్తులు......
భస్మమే ఆయన ఆభరణాలు.....
స్మశానమే ఆయన ఇల్లు......

భూతాలు ఆయన మిత్రులు ........
"లోకాల... కోసం నేను విషాన్నిమింగేస్తాను." అన్నాడు.

"రేపు రాబోయే అమృతం కోసం నేడు హాలాహలం తాగేస్తాను" అన్నాడు.
హాలా హల విషమంటే మాటలా? విషం దహించి వేస్తుంది. ఆవిరులు ఊపిరిని ఆపేస్తాయి.
అయినా విషాన్ని ఖుషీగా తాగేస్తానంటున్నాడు తిక్క శంకరయ్య.

"నాకోసం విషాన్ని తాగుతున్నావా తండ్రీ?" ఆప్యాయంగా అనుకుంది పాము.
అంతే చర చర బిర బిర వచ్చి విషం మంటలను తగ్గించేందుకు ఆ శంకరయ్య గొంతుకు చుట్టుకుంది.

విషం గొంతు దిగితే చతుర్దశ భువనాలు ధ్వంసమైపోతాయి.
కాబట్టి అది గొంతు దిగకుండా భార్య ‘పార్వతి’ వచ్చి ఆయనలో తాను సగమైంది.
గొంతును అదిమి పట్టుకుంది.

"జగత్తు కోసం విషం తాగుతున్న ఓ చక్కనయ్యా... నీకు చల్లదనాన్ని పంచుతా".
అంటూ చంద్రుడు శంకరయ్య తలపై కూచుని వేదన తగ్గించే చల్లదనాన్నిచ్చాడు.
శిరోభారం తగ్గించేందుకు గంగ చిరుజల్లులు కురిపించసాగింది.
..
విషం గొంతులో ఉంది.
శంకరయ్య నీల కంఠుడయ్యాడు...
గరళ కంఠుడయ్యాడు....
స్థితి కంఠుడయ్యాడు.
తల తిరుగుతోంది.
మత్తు ఆవహిస్తోంది.
విషం తన పని తాను చేసుకుంటోంది.
రాత్రి గడిస్తే కానీ విషయం అవగతం కాదు.
..

"అయ్యో మాకోసం త్యాగం చేస్తున్నావు. నీకోసం మేముంటాము" అంటూ, సప్త లోకాలు, చతుర్దశ భువనాలు, ముక్కోటి దేవతలు, శతకోటి జనాలు, అశేషకోటి జీవాలు రాత్రి తెల్లవార్లూ అతడిని కనిపెట్టుకుని నిద్ర మాని జాగారం చేశాయి.
‘సమాజం’ కోసం పనిచేసేవాడికి ‘సమాజమే’ తోడు.
‘లోకహితం’ కోరేవాడికి లోకమే హితం చేకూరుస్తుంది.
‘జనం’ కోసం విషం తాగిన వాడు. 
అందుకే ‘శవం’ కాకుండా ‘శివం’ అయ్యాడు.
ఆ రాత్రి శివరాత్రి అయ్యింది!!!
 
--(())--